بتحلف لية بقلم /احمد عبد الحق

بتحلفي ليه
انك لسه قد الوعد
وان عبايتك لسه نظيفة
وان مشاعرك لسه شريفه
وانك وانك
لاخر عمرك حافظه العهد
لا وحياتك كدبك زاد
كدبك اصلا جوا وريدك
انا مش ظالمك
لما وصفتك يوم بخيانه
كل الناس حسوا باهانه
لما شافوك واحده جبانه
واحده لابسه توب العفة
مداري من تحت شيطانه
هات كوتشينه وفرق يلا
هاتلي الصوره
اصل الصورة ديما تكسب
بس الصوره شايفها عجوزه
مهما بتكدب
شايفك وحاسس وجعك
مهما تداري
ومهما يحاول دمعك يهرب
اقولك حاجه
مهما تحاولي تبيضي وشك
طينك يكسب
ومهما حاولت تغيري نفسك
طبعك يغلب
ياللي واخد علي الخيانه
موت بيها
انت مخلوق بالخيانه
وبالخيانه هتموت فيها
احمدعبدالحق